Tras o éxito da ponencia sobre intelixencia artificial de Jon Hernández e enmarcado dentro do noso III Outono Loxístico, organizamos unha segunda cápsula formativa, EXCLUSIVA PARA SOCIOS, sobre Xestión de Crise e Continuidade de Negocio. A ponencia presenta un enfoque práctico e estratéxico para xestionar a continuidade operativa das empresas ante situacións de crise. Este evento está pensado para executivos e técnicos de sectores como loxística, produción e distribución que desexen garantir a resiliencia e sustentabilidade dos seus negocios.
Durante a sesión, cubriranse aspectos esenciais dun Plan de Continuidade de Negocio (PCN), incluíndo o seu desenvolvemento e implementación, xunto co marco normativo internacional, como a norma ISO 22301. A ponencia abordará preguntas clave como: Que procesos críticos asegurar primeiro? Como mitigar o impacto financeiro, operativo e reputacional dun incidente? E como establecer un tempo de recuperación adecuado (RTO)?
Os asistentes obterán coñecementos sobre a Análise de Impacto no Negocio (BIA) e estratexias de recuperación que permitan manter operacións en niveis mínimos aceptables ata a volta á normalidade. Ademais, trataranse casos reais e simulacións prácticas, que ilustran dende a xestión de recursos alternativos ata a importancia dunha comunicación efectiva durante unha crise.
Este evento é unha oportunidade única para fortalecer a preparación empresarial ante riscos crecientes, con beneficios directos na continuidade do servizo ao cliente e na protección da reputación corporativa.
